lunedì 20 ottobre 2014

L'uso del quel nel dialeto triestin

Ogi el nostro Monon Behavior Filologic Department ga deciso de aprofondir un poco el discorso sul'uso del quel, che za tempo fa, sul primo Monon Behavior, iera stado ben definido cussì:

Quelling: words substituted with “quel”.

Desso, dopo oculade osservazioni sul campo, gavemo capì che el quelling no pol esser semplificà in sta magnera, ma va ben definì e classificà, per no far casin. Se no dopo vien fora che tuto xe un quel, quando invece quel podessi no esser un quel qualsiasi.


Eco dunque i diversi gradi del Quel:

Quel di primo livello: sostituisce cose. Tipo, per esempio, "passime el quel", che pol esser un cuciar o un ciapin, per dir.

Quel di secondo livello: declinabile, per darghe più specificità. Quindi se parlerà de "quela", "quei", "queialtri", "controquei". Sostituisce cose, esattamente come il quel di primo livello.

Quel di terzo livello: sostituisce verbi. Oviamente xe declinabile. Tipo, per esempio, "ogi go voia de quelar un pomo", "ierimo là che quelavimo la rioda sbusada...", "quelime el quel per piacer".

Quel di quarto livello: sostituisce nomi di persona. Tipo "ierimo mi, Toio, Quel, Gianni".

Tuti i triestini, oviamente, capissi subito la parola nascosta drio un quel. Però esisti ancora un livel, l'ultimo, quel che solo i veri pol comprender e aprezar fin in fondo. Quel che xe l'emblema del'animo scazà del triestin. Lui:

Quel di quinto livello Super Sayan: sostituisce intere frasi. Per bon. Giuro, Tipo, per esempio, "Ciò insoma ierimo in ferie, alora semo partidi, semo rivai a Rovigno e là solito... te magni... te ciapi sol... e quel, e dopo do setimane semo tornai indrio.". Fazemo notar che questo Quel, che solo el vero triestin pol comprender in tuta la sua potenza, riassumi due setimane de vacanze a Rovigno in una parola sola.
Top.

E voi dirè:
Sì, ma invece de scriver tuta sta papardela, no bastava riassumerla con un bel "Quel"?
Gavè ragion. Bravi. Gavè apena ragiunto el Quinto Livello Super Sayan de consapevolezza del Quel.
Respect.

Partecipa anche tu al crowdfunding per FRICO

1 commento:

  1. N'demo subito al quinto livelo, quei per iniziati. Veramente no lo conosevo (le mie origini xe per metà istriane e per metà cruche, gabi pazienza!). In particolare nela frase de esempio cosa vol dir "quel"? Che gavemo fraià in generale, che iera anche taconela dove che ierimo, che gavemo solo spavà?

    RispondiElimina

Disi la tua, ale!